ما اغرب التعليم فى مصر وخاصة التعليم الميرى هو كل أنواع التعليم فى مصر غريبة بس الميرى ليه خصوصية جامدة تختلف عن باقى انواع التعليم سواء كان تجريبيى أو لغات أو خاص أو انترناشونال أو امريكان أو حتى أى جى ..
كلهم فى مصر أغرب من بعض لكن الميرى صاحب الأرقام القياسية فى برنامج مواقف وطرائف
( برنامج كان بيجى زمان على القناة التانية الميرية ) وخصوصا فى مدراس العشوائيات ترى فيها اعجب العجاب !!!!!!!!!!!!!!!!!
نبدأ بالمرحلة الابتدائية وهى مرحلة بناء النشأ اللى بندمر فيها مستقبله مثلا فصل فى سنة خامسة ابتدائى طبعا كله بياخد دروس بس ازاى ؟ نجد حالة فريدة تتميز بها العشوائيات ألا وهى المدرس بيدى كل المواد بمبلغ شهرى ميجبش وجبة من مؤمن ولاحتى كنتاكى !!!
المدرس مثلا متخصص فى المدرسة فى مادة واحدة لكن فى الدرس بيدى كل المواد إلا النجليزى مش عارف ليه ولى الأمر بيخاف على ابنه فى الانجليزى بس باقى المواد لأ يعنى مثلا مدرس رياضة يدى فى الدرس كل المواد ماعدا الانجليزى !!!!!!!!!! مش عارف اشمعنى الانجليزى خلاص التطور عندهم عالى وياريتهم بيعرفوا انجليزى أصلا !!
اللى بيحصل ده بيفكرنى بواحد عايز يشترى حشيش بس راح يشتريه من فكهانى ومصصم يشترى منه تفاح على انه حشيش لدرجة ان الراجل الفكهانى اتخنق منه وباعله التفاح على انه حشيش والتانى ماشى ومصدق انه معاه حشيش!!!!
فى الاعدادى عادى بياخد عن كل مدرس مادة بس معظمهم بيروح معاهد من اللى تحت السلم اللى المجارى دايما مضروبة تحتها والعيال عادى بتحضر وبتنبه للريحة مش للشرح طبعا !!!
أما فى الثانوى طبعا معظم اهل العشوائيات مش بيدخلوا ثانوى عام عشان ماجبوش مجموعة قلة قليلة هى اللى بتدخل ثانوى عام أما الباقى بيروح فى اتجاهين الأولاد بيرحوا صنايع والبنات بيروحوا تجارى وبنرجع تانى لنظام الابتدائى تلاقى مدرس بيدى كل مواد تخصص لصنايع أو التجارى بنفس السعر اللى كانوا بيدوه للمدرس فى الابتدائى اللى هو مبلغ شهرى ميجبش وجبة من مؤمن ولاحتى كنتاكى !!! ( برضو )
نيجى للمدرس اللى بياخد فلوس ملهاش لازمة طبعا مش بيراعى ضميره المهم ينجح العيال فى الامتحان يدخلهم اللجنة و يظبط أعمال السنة و يظبط الورق فى الكنترول طبعا ده للى بياخدوا عنده درس ممكن يعمل نفسه أراجوز عشان خاطرهم !!!
وبما أن المبلغ مالوش لازمة فهو بيعتبره رشوة عشان ينجح العيال واخر حاجة بيفكر فيها انه يشرح أو العيال فهمت ولا لاء ؟
والعيال طبعا فهموا كده ومبقوش يذاكروا ولا عايزين يفهموا أصلا ويذاكروا ليه وهما دفعوا الرشوة وعارفين أن المدرس هيظبطهم ومش هيقدر يعملهم حاجة
وعلى رأى محمد هنيدى فى فيلم ( رمضان مبروك أبو العالمين حمودة ) :
هو المدرس بعد ما قعد على الكنبة وشرب العصير وأكل الكيك وقبضوه كل حصة هيبقى ليه هيبة !!!
ليست هناك تعليقات:
إرسال تعليق