الحياة اختيار

الحياة متشاويش لحظة حزن ولا تساوى انك تبيع نفسك عشان حاجات مش هتنفع بعد كده . اكيد فى يوم هنموت ومش هيبقى فى لازمة لكل اللى احنا بنحاول نحصل عليه . أكيد بنشوف فى أى مكان بنروحه شغل أو جامعة ازاى الانسان بيحاول ياخد اكتر من حقه وازاى بيتنافس منافسة شرسة اللى ساعات بتكون شريفة وساعات مش شريفة . ازاى كل واحد نفسه يطير اللى معاه ويأش هو كل حاجة أكن الكون لازم يشيل واحد بس ومش هيقدر يشيل اتنين . ما أغرب الانسان كل همه كفاح لقمة العيش اللى بتتمثل قدامه فى الوصول لأعلى مركز بغض النظر عن ازاى هيوصل للمكانة دى وازاى يحققها. فى ناس بتتصور ان عشان توصل لازم تبيع أى حاجة وكل ما تقدر تبيع اكتر كل ما توصل أسرع ولكن هو سعيد بعد ما حقق اهدافه اللى كان نفسه يحققها ؟

من جواه هو مش سعيد لما بيفكر هو ازاى بقى كده بس هو بيعمل كده ومحسس نفسه انه مضطر لكده

( هو انا لقيت حاجة ومختهاش ) بس الواحد لازم يمشى بمبدأ الصبر اللى لازم تتمسك بيه مع الرضا يعنى خلى بالك من حكمة : القناعة كنز لا يفنى هى دى اللى ممكن تخليك تحقق اهدافك بطريقة تحس بيها انك مبسوط حتى لو حلمك اتحقق بعد فترة طويلة أو متحققش خالص هتعيش مبسوط وراضى ومش زعلان لازم تفكر فى بكرة أنا مش قصدى تومورو انا قصدى فى المستقبل وكمان فى مستقبلك فى الاخرة هتكون مبسوط وراضى ولا لاء؟؟؟

فكر فى الاخرة مش فى الدنيا !! بجد فكر فى نهايتك كويس وانت هتقدر تحدد الطريق الصح اللى تمشى فيه من البداية .. وهتعرف على اساسه انت ناوى تمشى فى اى طريق !!

نصيحة أخوية قبل ما تفكر فى أى طريق معروض عليك فكر فيها كويس قبل ماتختار أى طريق

(راقب أفكارك قبل ان تصبح أقوالاً وراقب أقوالك قبل أن تصبح أفعالاً وراقب أفعالك جيداً فهى مصيرك للمجد أو الزوال )