مـا عـلـيـنـا

ما علينا لا رحنا ولا جينا أخدوا فلوسنا و ضحكوا علينا ، ناس أحلى من الحلاوة تطلب حلاوة يدوك بقلاوة ، تقول يمين يروحوا يمين ، تقول شمال يروحوا شمال ، من غير ما تقول تبصلهم بس بعنيك عيب دى ناس بتفهم فى الأصول والأتكيت ، أكل و مرعى و قلة صنعة ، ناس عايشة بتعوم فى مية البطيخ ، السما بتمطر بلح كتير ، ربنا يستر يا حفيظ ، نفسه يشوف عناباية قبل ما يموت ، و يقلع عباية الخوف ويلبس جلابية الرجولة و الذوق و يعيش دكر مش شوية فيشة و شوية مشترك ، نفسه قبل ما يموت يبقى راجل دكر ويحط على حرمه المصون ، يرفع راسه وسط الناس و يعيش بكرامة إن شالله يوم أهو أحسن من ما فيش ، نفسه يسمعها منها قبل ما يموت ، الله يا عنتر يا شديد ياللى عبرت طريق صعب صعب شديد شديد وفى إيدك سيف حديد تكسر بيه كل سد منيع و ترجع كل حق راح ، يالا على الدنيا السلام ، بداية أو نهاية مش فارقة ، إيه لازمته نقول باقى الكلام ، كله زى ما هو ، فى مكانه زى الفل و تمام ، وربنا يستر و يطلع حلم ، ونحاول نقوم ، هو يعنى إحنا كرهنا كل حاجة وحبينا النوم .... و ما علينا