أخـيـراً افـتـكـرت الـعـرب

الى رئيس الكرة الأرضية باراك أوباما

أهلاً وسهلاً بك فى بلدنا الثانى مصر ( على أساس إن البلد بتاعته وإحنا ضيوف فيها )

زيارتك لمصر أم الدنيا جت متأخرة أوى أو بمعنى أصح حضرتك طنّشت العرب خالص يعنى بعد ما تملحصت لإيران وزرت تركيا قولت لنفسك يالا نعبر العبط بتوع الشرق الأوسط الغجر اللى اسمهم العرب على اساس ان اخنا ملطشة المنطقة .

ده انت يا راجل قبل ما حتى تمسك الحكم عبرت اسرائيل اللى هيه زى حتة الدمل المعفن اللى لو العرب اتحدوا وكل واحد رفع قلم كوريكتور كانوا مسحوها من على الخريطة ( لو اتحدوا - طبعاً شىء مستحيل )
المهم أن الشعب العربى قبل ما أنت تمسك الحكم كان طالع بيك السما( مش عارف ليه؟؟؟)
كانوا عايشين الوهم إنك مسلم والكلام الفارغ ده وأنك هتنصرهم على اليهود( معجزة فى زمن انتهت فيه المعجزات - قول مأثور للزعيم : محمد حسنى مبارك -قائد الضربة الجوية الأولى فى حرب أكتوبر المجيدة!!!)

الكل عارف ان العلاقة بين مصر وأمريكا كان فيها طتش كبير لدرجة ان الرئيس بتاعنا بطّل يروح امريكا وكان بيبعت أمين السياسات (السيد جمال مبارك) بدلاً منه وده عشان سببين : الأول ان الريس كان زعلان من بوش والتانى تدريب لجمال على أمور الرئاسة.

بس الحمد لله أيام بوش اللى ما يعلم بيها الا ربنا راحت لحالها وبدأنا عهد جديد مع رئيس جديد اللى لازم يضحى بخروف العيد والحمد لله العالم العربى وبوش كل واحد راح لحاله وخالتى وخالتك واتفرقوا الخالات.دلوقتى احنا بدأنا عهد جديد مع رئيس جديد وليه كاريزما والناس فى العالم كله بتحبه وبالذات فى مصر خصوصاً الستات عشان هو شبه أحمد زكى!!!!!!!!!!!!!!!
ونفسهم اوباما يحتل مصر ( والله هينضفونا !!!!)
عارف ان فى واحد حاقد يقوللى هما يعنى نضفوا العراق لما هينضفوا مصر ( سمعتك يا أبو لسان طويل - سؤال ذكى من انسان تافه؟؟!!)
أرد اقولك اللى احتل العراق كان بوش الصغير لكن اللى الستات عايزينه يحتل مصر ده باراك أوباما ( الــكــبـيــر) !!!

يارب تكون خطبته لود الشعب العربى تفلح وتعدى أيامه فى مصر على خير (أصل أنا شامم محاولة لأغتياله)